بعد تجربتي لهاتف أوبو A93 حبيت ألخص سريعا أهم الحاجات اللي في الهاتف تخليك تفكر تشتريه:
١- تصميم الجهاز شيك وحجمه سهل قوي تشيله في جيبك ٧.٤٨ مم سمك ووزن ١٦٥ جرام ودي نقطة اصبحت نادرة قوي اليومين دول مع البطاريات العملاقة اللي بنشوفها في الأجهزة
٢- الشاشة الأموليد الجميلة والبصمة المحترمة السريعة اللي تحت الشاشة
٣- السوفتوير المتوافق دايما مع أي عتاد داخلي أوبو بتختاره حتى لو بالأرقام في شركات تانية بتقدم عتاد أقوى بنفس السعر لكن يظل نقطة سلاسة الواجهة وتوافقها مع المعالج في صالح أوبو
٤- تشكيلة الكاميرات ومعالجة الصور اللي في اجهزة أوبو بتعجب البنات قوي ? ودايما بناتي وزوجتي بينبهروا بالصور اللي بيتصوروها من هاتف أوبو وخصوصا الفلاتر وتنقية البشرة بتخلي الصور حلوة ولو ضيفنا على ده المعالجة اللي بتحصل لصور المناظر الطبيعية وجمال الألوان فالنتيجة دايما بتكون مرضية
بالاضافة ان حديثا أوبو ضافت امكانية عزل الخلفية في تصوير الفيديو ولكن لسه بدري عليها عشان تكون بجودة تقدر تعتمد عليها وتصور بيها لأنها حاليا جودتها أقل من المتوسط
٥- ذاكرة داخلية اصبحت هي الحجم الأمثل حاليا ١٢٨ جيجا مع ٨ جيجا رام بالاضافة لدعم شريحتين + كارت ذاكرة خارجي لو عايز تزود المساحة
٦- البطارية أدائها كويس مع تظبيط السوفتوير و٤٠٠٠ مللي أمبير حجم مش وحش ابدا مقابل ان الهاتف يكون حجمه صغير مش سميك ويكون خفيف في الأيد
في نقطة ظريفة أوبو عاملاها في شحن البطارية أثناء الليل للناس اللي بتشحن التليفون وهي نايمة عشان الصبح تنزل بيه ١٠٠%
التليفون بيوزع شحن اخر ٢٠% قبل معاد صحيانك بحوالي ٩٠ دقيقة بس دي محتاجة تنظيم عشان الAI Algorithm يتعلم امتى بتنام وامتى بتصحى فيبدأ يظبط القصة دي
وأوبو بتقول انك لو فعلت Super power saving mode في حالة ان بطاريتك نزلت اقل من ١٥% وانت برة البيت ومش معاك شاحن فانت هتقدر تعمل مكالمات لمدة ٧٠ دقيقة وماتستهلكض غير ٥% فقط من البطارية
الملحوظات اللي عليه:
١- سعره ممكن يكون غالي لو انت من الناس اللي بتقارن بالأرقام بينه وبين أجهزة تانية
٢- الشاحن سريع بس مش السرعة اللي اتعودنا عليها من أوبو يعني ١٨ وات في ٢٠٢٠ انا مش شايفه سريع
٣- الكاميرا الثانية الامامية أو السينسور الخاص بإيماءات الإيد عشان الرد على المكالمات مثلا عن بعد مش شايف ليه لازمة والافضل استغلال قيمته المادية في حاجة اخرى أهم زي اضافة NFC أو سماعة المكالمات تشتغل مع السماعة الخارجية عشان تدي صوت ستيريو افضل